انا لا أكذب ولكنى اتجمل  

مرسلة بواسطة كرانيش

متسألونيش بحب مين من المغنيين؟ عشان العادى انى اقول منيرواعمل فيها بروح ساقيه الصاوى كل يوم و متسالونيش بحب مين من المغنيات ؟عشان بديهى جدا انى اقول فيروزوابين بقى انى بصحى على صوت العصافير وصوتها
ومتسالونيش ايه الافلام اللى بتحبيها
:عشان هقول
افلام يوسف شاهين طبعا منا لازم ابين انى مثقفه
رغم انى بقعد قدامها كانى بتفرج على فيلم تايوانى مش مترجم
ومتسالونيش بحب لون ايه؟عشان طبيعى هعمل فيها رقيقه واقول السماوى عشان بيفكرنى بلون السما وهقول بعدها
"اصل السما من الحاجات اللى بتشدنى بحس انها عالم تانى فيه مخلوقات تانيه0
ومتسالونيش انا برج ايه ؟عشان هضطر اقول العزراء
وانا برج العقرب اصلا
ومتسالونيش الهديه اللى تحبى تتهادى بيها ايه؟
عشان هرد واقول
الهديه مش فى قيمتها يعنى مثلا ورده
وهقول فى نفسى وياريت معاها تلاتين جنيه عشان اقدر اكمل الشهر
ومحدش يسالنى تحبى تكونى فين دايما؟
عشان هرد بمنتهى الرومانسيه واقول جنب البحر طبعا ودى عاوزه كلام؟!!
ومتسالونيش عن علاقتى بالناس اللى حواليّه عشان هرد واقول
الناس كلها بقت وحشه
وانا بحاول اتاقلم معاهم
ومتسالونيش ليه بتحبى الشعر؟
عشان هعمل فيها نزار قبانى واقول الشعر بيخلقلى حياه تانيه
ومحدش يسالنى عن اى حاجه
عشان كل حاجه بقت كدب
الناس كلها بقت بتكدب
حتى انا بقيت بكدب على ماما كتييير
وبقيت ببدا اتعلم حرفه الكدب
يارب عافينا واعف عنا
امييييييييييييييين

This entry was posted on ٠٠:٥٩ and is filed under . You can leave a response and follow any responses to this entry through the الاشتراك في: تعليقات الرسالة (Atom) .

34 التعليقات

لو علشان تفضلى بنى آدمة زى ما انت دلوقتى يبقى لازم تكذبى

اكذبى

وبعدين الشعر بيخلق الحياة اللى لازم تتعاش

سلام ياقمرا

ههههههههههههههههههههههههه
والله كنت هموت من كتر الضحك يخرب عقلك يا كرنوشه بس متخافيش ربنا بيسامح يعنى

رغم قسوة اللى بتقوليه إلا انه كلام للاسف لازم و ضرورى
وده ردى لو حد سألنى عن الكذب هقوله طبعا و أنا بكدب

عين ضيقه
مجبر اخاك لا بطل
...
غاده الكاميليا
كويس يا بنتى انك لسه بتعرفى تضحكى
...
كائن العزله الكئيب
يا سيدى كلنا كذابون

جامدددددددددة جدااااااا

بس بيتهيألي يا كرنوشة إن ده مش بيبقى كذب أصلا على قد ما بيبقى تصور معين الواحد واخده عن الأشياء ، و لما بيبدأ يعاين الأشياء دي التصور ده بيتضح صحته من إدعائه

يعني مثلا حاجات كتير م اللي انتي بتقولي عليها دي كانت بشكل ما إجابات تلقائية للواحد ، بعد كده الاجابات دي اتغيرت
لدرجة إن أحدهم لما جه يسألني بحب مين م المغنين و اتكلمنا عن منير شوية ، اتصدم لما قلت له اني باحب بعض أغانيه بس ، لكن مش بتفاعل معاه قوي

أفلام يوسف شاهين برضك - من سمعتها و من الهالة اللي معمولة حواليها - و الواحد كان بيقول أكيد ده شخص بيفهم و كويس ، بس الجمهور هوه اللي مش قادر يتواصل معاه
لكن لما الواحد يشوف أكتر من فيلم ليه بيبدأ يكون رأيه الخاص ، و يقدر يقول بثقة " ده واحد بيتفزلك غالبا أكتر منه بيعمل فن "

فيروز فن ، و رائع بجد
لكن ----- ما أقدرش أقول إني لحظة ما أتماهى مع حد بجد و أحس إنه بيعبر عني و عن شخصيتي هاتكون هيه
بالعكس يعني ، أصالة - اللي بالنسبة لكتير مش ذوق عالي في الغنا - و كاظم ، اللي بالنسبة لكتير بيسبب توتر
أحسهم بيتكلموا عن لساني أكتر



و هكذا و هكذا


هيه المسألة بس اننا نفتح عنينا لاكتشافاتنا الخاصة
و ما نستمرش في الوعي الجمعي - اللي طبيعي جدااا إننا نتأثر بيه في بداية تماسنا مع الأشياء

و بيتهيألي إن البوست ده في حد ذاته ما هو إلا إعادة إكتشاف للأشياء و إعادة تقييم لها

والله كلام جامد جدا (:
كنت لسه بتكلم مع أخويا في الموضوع ده من فترة
كان بيقوللي دلوقتي سماع منير وفيروز بأه روشنة (:
بس مش معنى كده ان كل الناس بتكدب لما بتقول عن نفسها بعض الحاجات دي
يعنى انا فعلا بحب فيروز جدا لكن مش بحب محمد منير
وفي نفس الوقت مش بس فيروز اللي بسمعها ليل نهار بسمع كل حاجة تانية

سبحان الله
وكأنك كنتى معيا
وبتتكلمى عنى
احم احم

بصى يا ستى انا من راى ان كل دى حيل دفاعية
الناس بتعملها لتفريغ نوع من الكبت
او احساس بالنقص
بلاش ندق على كل حاجة
لو حبة الكدب دول هما اللى هيفرحوا الناس
سبيهم يكدبوا
ويتجملوا
بس فى نفس الوقت بتبقى اكيد مؤلمة بالنسبالهم
انتحالك شخصية غير شخصيتك
اكيد بيبقى مؤلم ليكى
مش للناس

مممممممممممم
كويس انك معترفة
بس انا فعلا بحب منير وفيروز..وبحب اللون السماوي انا مش بتريق ولا بهزر انا بتكلم بجد...وكمان بحب البحر مووت
بس مش بحب نزار قباني بحب صلاح جاهين ومش بفهم حاجة من افلام يوسف شاهين :)
بحب الهدايا العملية الي اقدر استفيد منها
كلنا بنكذب بس اللححظات الي بنقرر فيها نقول الحقيقة بتبقى اجمل لحظات فعلا

على فكرة انا سبت تعليق قبل كدة هنا وحد علقه مني على ما يبدو بس المهم: انا لا اكذب ولكني اتجمل؟كلنا بنتجمل والله بس في حد بيبرز محاسنه الحقيقية وفي حد بيعوض نقص فيه بانه يتظاهر بعكس الحقيقة كلنا بنحب فيروز وبنسمع منير ونقول يخرب عقلك , وأكيد برضه كلنا بنمسك قلوبنا لما بنقرا نزار لتنط بره صدورنا والكل عامل نفسه فاهم كل حاجة , بس الأكيد انك مش كذابة لما يوحشك صوت فيروز او لون السما لكن ممكن تكوني كدابة لو سمعتيها غصب عنك في اغنية مابتحبيهاش او بصيتي للسما في وفت لازم نشوف الارض تحت رجلينا فين
واللي بيكذب بيروح فين؟
اوعي تقولي مارينا

بوركت

مع ابن غلبان جدااااا في اللي بيقوله

على فكرة بيروحوا يصيفوا في أوروبا اليومين دول :)

لو فعلا انتي بتفكري بالطريقة دي
يبقي انتي فعلا حد محترم جد جدا جدا
وشكلي والله اعلم
هاتجنن قريب بسبب جامعة الزقازيق
اللي قورت نافوخي دي
روحي ياشيخة
الله يعمر بيتك

ربنا يهديكى يابنتى وتبطلى كدب

شغف
يا مصيتنى
والله يابنتى انتى اللى جامده
لو كل واحد دخل عندى كتب تعليقين مكانش ده بقى حالى
عالعموم كويس انك مختلفه نوعا عن الاجابات الشائعه
.....
دينا فهمى
انا مع اخوكى جدن
بلغيه بانى بحييه
....
الورده السوده
على فكره الكدب عمره ما كان بيفرح
الكدب بيبنى شخصيه غير مكتمله
وضعيفه
...
بيسو
الاعتراف بالحق فضيله يابنتى
...

عنتر بن غلبان
لا لا لأ
انا معنديش زباين بتعلق يا استاذ عنتر
على فكره اللى بيكدب بقى بيروح اى حته هو عاوزها مش مارينا ولا اوروبا بس
ده حتى بقوا بيروحوا ابو كبير يابنى
....
ادم المصرى
جامعه الزقازيق مش هتقدر تغمض عنيك
كرانيش....انت لسه شفت حاجه
....

بياترتس
ايوه ادعيلى بالله عليكى

لا تقلقى لن نسالك عن اى شيء
بس هو، فيه استفسار صغير يعنى
انت فعلا بتعرفى تكدبى؟

يبقى اكيد الممثل المفضل ليكي احمد زكي ... مع انك بتحبي عادل امام

!!!

ممكن اسألك انت كاتبه الكلام ده ليه؟!!

مبروك شكل المدونة الجديد

والله يا ست كرانيش الحد اللي متعود يكدب او يظهر نفسة بشكل معين حاسس انه هيزيدة ف نظر اللي قدامه فدة مش هيفرق كتير عن اي حلاجة تانية غير الامثلة بتاعتك الي انتي جايباها وبجد انا موافقك ف حاجات مش عشان كدب لا عشان بقت مملة من كتر ما الردود متكررة ومعروفة خصوصا بخصوص الهدية مثلا
يمكن علشان تعاملك معظمة مع ناس بتكتب وكدة والاذواق بردةى ما تفهميش اية سر فيروز ومنير بالذات يمكن حكاية منير وفيروز متكررة معاكي لكن بجد انا بتكلم مع نااس كتير وبكتشف انهم مش بيحبو منيري يعني ولا حاجة وناس تانية بتحب بعض اغاني فيروز وناس تالتة ما بتقبلش حاجة اسمها يوسيف شاهين علي الاطلااق
ومع ذلك يمكن طبيعة الاسئلة نفسها بتفرض شكل الاجابة بمعني انك لو سالتيني بحب مين وخلاص هرد عليكي وخلاص وهقولك بحب منير مثلا انما لو سالتيني اية بيعجبك فية بالضبط كدة يعني اكيد الامر هيختلف وهحس ان في اهتمام واخدة باالك بس يعني
وبردة انا مش عارف اية حكاية برج العذراء يعني مالة يعني برج الجدي ؟
عموما البوست دوة فعلا مثير
وبعدين بردة انا شايف نااس بدات تتراجحع كدة ومش عارف اية علي فكرة نااس كتير فعلا بتحب فيروز ومنير ودة قدر بقي وخلاص هيعملو اية هما فعلا بيحبوة
سوري دة اطول تعليق علقته ف حياتي تقريبا
سلاااااام

سكمونس
على فكره حرفه الكدب دى صعبه جدا
على فكره انا مبعرفش اكدب بس بحاول
كنت زمان لما اجى اكدب اروح ضاحكه فى وسط كلامى
ماما تعرف علاطول
.....
sharm
لا والله لا بحب ده ولا ده
تحياتى
....
سمسم
منورنى والله
انا كاتبه الكلام ده
لانى بقيت بسمعه كل يوم
بقت دى هى الاجابات النموذجيه اللى هتاخد عليها عشره من عشره
وده استفذنى خلانى كتبت البوست
...
سمسم تانى
الله يبارك فيك

besara7a keda ma3reftesh 3anek ay 7aga

غير معرف  

واقعي جداا

الله يا بنتى عندك حق..كله بقى قص ولزق
مبقاش فى حاجه حقيقيه نمسك فيها .. كله قص و لزق


المشكله مش في اننا بنكدب ولا بنتجمل
المشكله اننا فعلا ساعات بنحب ده
ايا كان اسمه
مثلا ساعات كتيره جدا تلاقي ناس بتحب فيروز لانهم عايزين يبقوا مثقفين
او لان الموضه بقيت الدندنه باغاني فيروز
وده منقدرش نقول عليه عيب؛ لان النتيجه واحده في كل الحالات , هو بيحب فيروز , وبيسمع فيروز
المنطق ده في كل حاجه بقي .. شاهين ومنير وغيرهم
وعلي فكره الوعي الجمعي - اللي بتتكلم عنه شغف - مش عيب ابدا ؛ لانه في احيان كتيرة جدا بيشكل وعي فردي يقدر الانسان يمنطق بيه حياته
مثلا وجودك في وسط مثقف كان نتيجته انك سمعتي منير وقريتي نزار وتابعتي شاهين
فلو انتي حبيتي منير ونزار وشاهين ساعتها هنقدر نقول ان الوعي الجمعي /السائد تحول لوعي فردي
.......................
سؤال بقي
هو انتي فعلا مبتحبيش منير؟؟
.......................
عزيزتي
دمتي بود

على فكره الوقتى الكدب طلعله رجلين وايدين كمان

بقا كائن مستقل

طبيعى .. الكدب فارض نفسة واللى يقول غير كدا عايز اعرف اجابته : الشمس كوره ولا مكعب ؟؟


مودتى

شبابييك
الحاجات دى كلها بقت للاسف موضه
بس انت عندك حق فى حكايه المحبوب واحد لكن الاسباب مش واحده
انا متشكره جدا لان اطول تعليق كتبته فى حياتك كان عندى انا
دمت لى اخا شقيق يا شبابيك

دماغ ماك
ليه جايبلى عريس؟
....
ارتعاشات
مش كده برضو؟
...
مويا
للاسف عندك حق
.....
just me
هى دى بقى الحقيقه المره؟؟؟
......
فرى فاروه
الا صحيح هى الشمس كوره ولا مكعب؟؟؟

....
سلامه
سؤالك صعب قوى يا سلامه
....

طيب نا بحب منير وفيروز بس مش بحب العصافير وشاهين ولا اللون السماوي ومش بروح الساقية عشان بعيد عن بيتي وبرج الميزان


يا بنتي انتي هي انيت بتفاصيلك وحياتك وعيوبك قبل مميزاتك

و الله لاغيظك و عليا الايه بالتلاتة مانا سالك عن حاجة؟ خليكى كده بقى ..نفسك تردى و مش لاقية السؤال ..زى يونس شلبى؟

بوست واقعى جدا

حاسس بنفس الاحاسيس

فعلا كلنا بنكدب على بعض وانا اولهم....انا بقيت بكدب كتير اوى دلوئتى على نفسي وعلى الاخرين

مش شرط يكون تصنع انى ممتاز وعظيم وعبقرى....او انى اتقنعر على غيرى واقول انا غني ومرتاح ومعايا ومعايا ومثقف والكلام ده

لكن ممكن الواحد يكدب على نفسه فى احلامه

فى تخيلاته وتصوراته

يتخيل انه ماشى جنب واحدة جميلة اوى والناس كلها بتبص وتحقد عليه وهو اصلا شبه القرد

يتخيل انه شايل مدفع مضاد للطائرات زي فيديوهات العراق وافغانستان وبيضربه فى عمارة كبيرة فيها واحد بيتخنق منه والناس تبص له بانبهار-مع انه ضعيف ونحيف والدبانة لو وقفت على جسمه يحس ان فيل خبطه بسرعة تمانين ميل فى الساعة


او يتخيل انه بيعلق فى مدونة محترمة جدا وراقية جدا زي دي..... وهو مدون بسيط فى عالم التدوين ....و انسان بسيط جدا فى عالم الاحاسيس

يا للبشر









خلاصة الكلام

مدونتك جميلة جدا

تحياتي

أزال المؤلف هذا التعليق.

بعيدا عن خفت دمك واني كنت هموت من كتر الضحك بس عاوز أقولك حاجه مش كل الناس وحشين زي مانتي قولتي زي مافي الوحشين في الكويسين..... الناس كلها بقت وحشه
وانا بحاول اتاقلم معاهم