فضفضه  

مرسلة بواسطة كرانيش

مش فى ذهنى حاجه معينه اكتبها لكن عندى الرغبه فى الكتابه او يمكن لو نسميها فضفضه هتبقى اوقع ... مش عارفه ليه معدتش بحس للمدونه بطعم زى الاول ولا بحس للكتابه بطعم زى الاول ياترى ليه؟؟ للاسف مش عارفه اوصل لاجابه دقيقه وشافيه عن الموضوع ده
ولا حتى قادره اخمن اجابات عشان ارضى بيها نفسى
ارضى... الرضــــــــــــا ... بقى بيشغلنى قوى اللفظ ده وبقيت بسال نفسى كتير ياترى انا راضيه عن حالى وعن نفسى ؟؟ ولو مكنتش راضيه ياترى ايه السبب ؟؟ولو كنت فعلا راضيه طب ازاى وصلت للاحساس ده..؟؟
ياااااااااااه أسئله كتير قوى من النوع ده دايما شغلانى وشاغله دماغى
طب انا ليه بكتب الكلام ده كله .. والناس اللى هيقروه هياخدوه باى محمل وهيشوفوه من اى وجهه نظر .. اكيد فى من الناس اللى هيشفق عليه ويقول يا حرام مسكينه البنت دى .. وفى ناس هتقول دى بتتفلسف وخلاص .. وناس هتقول دى دماغها اكيد طاقه وبتخلق من كل حاجه ميت سؤال تشغل بيه نفسها وخلاص .. وهم كده الناس اتفقوا على الا يتفقوا .. طب وانا اتفقت على ايه ؟؟ برضو مش عارفه
ساعات بحس من كتر ما بردد كلمه مش عارفه انى مبقتش عارفه حاجه خالص .. فعلا انا مبقتش عارفه حاجه خاالص بقيت بتصدم فى الناس ومبقتش اقدر احكم على مشاعرى ناحيتهم .. ومبقتش قادره اقرر ياترى الناس دول كويسين وحلوين زى ماهو باين عليهم كده ولا دى مجرد ادعاءات وكفى .. ياترى كلامهم ده نابع من جواهم وايمانهم بيه ولا هو مجرد كلام بيقنعوا بيه اللى قدامهم انهم ناس بيعرفوا يتكلموا بشكل كويس وبطريقه منمقه وانهم متحدثين لبقين لهم صولات وجولات فى خبره الكلام
بقى عندى يقين ان كل الناس وحشين لحد ما يثبتوا لى العكس

بقى عندى يقين ان مفيش يقين

......

على فكره الانفعالات دى مبتخرجش هنا عاده .. ومعنى انها خرجت هنا ده اكيد له دلاله يمكن انا مش عارفه دلوقتى ايه هى بس يمكن نكتشفها فيما بعد
فيمـــــــــا بعد ... كمان التعبير ده بيضايقنى انا حاسه ان نص حياتنا مأجلينها لفيما بعد طب ايه اللى مخلينا نأجل ؟ .. اعتقد ان اللى بيخلينا نأجل هو الخوف .. تبا له من احساس .. على فكره الاحساس ده مؤلم جدا لفوق ما يتخيل فرد .. الخوف والعجز يمكن الخوف هو اللى بيوصلنا للاحساس الملازم ليه وهو العجز .. لما تكون شايف نفسك خايف من حاجه اكيد انت عاجز على انك تعملها
عندى قصيده اسمها عَجَز
اولها بيقول

ماانتيش علامه للعَجَز
مفيكيش جروح
لكنك المصلوبه ع الفرع المميت
لا انتى اللى قادره تنشلى موتك من الدنيا
ولا انتى قادره تبدأى..

يارب افتكر ابقى انزلها فى بوست عشان اعرف راى الناس فيها
ويمكن يبقى للبوست ده بقيه معرفش امتى
الله اعلى واعلم

This entry was posted on ٠٠:١٧ and is filed under . You can leave a response and follow any responses to this entry through the الاشتراك في: تعليقات الرسالة (Atom) .

8 التعليقات

سمرايـــــــــة

إنتى كل تدوينة بتثبتى عن التدوينة اللى قبلها إنك إنسانة بحق ورقيقة ومرهفة المشاعر
انا دايما فى مدونتك بصنفك على إنك من اجمل من أقرأ لهم شعرى عامى
ولكى لون مميز واسلوب فريد أستطيع تمييزه من بين عشرات القصائد
اما بخصوص ميعاد البوست القادم
اتمنى ان يكون غداً
اتمنى أن تكتبى فى كل يوم ولو سطراً واحداً
أعشقك كلماتك فعلاً

أحمد

البوست جمييل اوى
وحسيت فى بعض الاوقات انك بتحكى عن احساس بكون عايش فيه فى وقت معين

والقصيده لازم تنزليها فى بوست علشان المقدمه جميله اوى

سلااااااام

السلام عليكم يا اجمل سمورة ياريت تتكلمى اكتر او حتى الفضفضة دى لان الكلام بيريح كتير اتمنالك السعادةاو عل الاقل راحة البال يا قمرى

لا تدعى إدعاء المدعى يفسد الخير الذى اظهره حتى لو كان خيرا ادعائياً

---
تكونت بداخلك أشياء اخرى تأخذ من حياتك جزء من التدوين


تحياتى
احمد مهنى

احمد

بيسعدنى وجودك وانت عارف
متقطعش الجوابات بقه

....
امبارح كان عمرى عشرين

اعتقد ان معظم الناس بتمر بنفس الاحاسيس دى
بس اعتقد كمان انها عندى زياده شويه
واكيد لازم انزل القصيده طبعا قريب ان شاء الله
...

بسمه مسلم
_________
هتكلم يا بسمه ان شاء الله
ده انتى هتشوفى كلاااااااام
ادعيلى يا بنوته

....

انت تسال والكمبيوتر يجيب
__________________________
اكيد هلبى الدعوه ان شاء الله

.....

حزين
___
ولو انى مبحبش اقول عنك حزين يا احمد
وجودك شرفنى يا فندم
بالنسبه للجمله
فانا مبقولش انى ندمانه على انى عملت مدونه بالعكس تماما المدونه دى من احسن الحاجات اللى عملتها من سنتين تلاته وبعتز بيها لاقصى حد
انا بس بقول ان طعم التدوين اتغير بالنسبالى بقيت احس انى متراقبه نوعا مقيده نوعا... يعنى .. انما انا مبنكرش ان المدونه كان ولله الحمد ليها افضال...
من ضمنهم مثلا وجودك يا فندم
ياريت تكون فهمتنى وفهمت وجهه نظرى

غير معرف  

والله التدوين ده فعلا مرض نفسي وياريت ماحدش يزعل مني لكن هو قمة الضلال والمرض وأنا عامل نظرية في الموضوع ده اللي يحب يتعرف عليها ممكن يراسلني على drjsph@hotmail.com
أعاننا الله وإياكم على هذا الضلال والبعد عن الصراط المستقيم لأن نظرية الخربقة تؤكد أن هذا المرض سوف يعصف بالأمة ولا عزاء للسيدات

ازيك يا سمركنت عايز اقول ان الكتابه ما بتقبلش تكون الاهتمام التانى ف حياةاللى بيكتب بعد كدا بيملك الكاتب احساس انه مش هيجيب جديد لان الكتابه مخلوق بيتوجد من احساسك بإبداع الأخرين ومن اللى بيعلق ف ذهنك من كتابتهم بتكونى مفردات قاموسك اللى ف البدايه بتحسى بشاعريتها وبيبقى مجرد اعلان لامتلاك اللفظ او التشبيه واما القاموس يخسر مصادر زيادة مفرداته بيبقى فيه فكره جديده وحالة كتابه جديده بس مفيش كلمه جديده

تقر يبا انا  

ازيك يا سمركنت عايز اقول ان الكتابه ما بتقبلش تكون الاهتمام التانى ف حياةاللى بيكتب بعد كدا بيملك الكاتب احساس انه مش هيجيب جديد لان الكتابه مخلوق بيتوجد من احساسك بإبداع الأخرين ومن اللى بيعلق ف ذهنك من كتابتهم بتكونى مفردات قاموسك اللى ف البدايه بتحسى بشاعريتها وبيبقى مجرد اعلان لامتلاك اللفظ او التشبيه واما القاموس يخسر مصادر زيادة مفرداته بيبقى فيه فكره جديده وحالة كتابه جديده بس مفيش كلمه جديده
اعتبريها فضفضه