كسرة روح  

مرسلة بواسطة كرانيش


كسرة روح


من وقت ما راودتنى روحى ع الصراخ المصطنع

وصرخت عالى للوجود

وبقيت وحيد .. يمكن خطايا تشدنى

وانا برتجف جوايا من كتر الوجع

مكسور ومالينى فراغ

لا انا بستمع ليكى بجد

ولا انتى قادره تمثلى .. وتكونى دور المستمع

انا مش برىء زى ما انتى فاكره

اوعى تشوفينى يوم كما فارس معاه خيله

لا بملك يا صبيه الخيل

ولا عمرى هكون فارس

انا يمكن معايا الحلم

لكن الحلم متفسر كلام كداب

لاهقدر يوم اداويكى ولا حاجه

ولا ههديكى طوق الفل ف اديكى- كما حلمنا- ولا حاجه

ولا هتجينى تتدارى من الغربه ولا حاجه

فمتلومينيش على عجزى

وكسرة روحى بالمره

ويكفينى.. بعيد عن كل ما احلم

انا ... كل اللى كنته كدب

مانيش عاشق يا ست الكل لعنيكى

واذا مره خطيت وغلطت فى المعنى

فده يمكن عشان عطشان لحبه حب

ويمكن برضو تلقينى على عتباتك الوردى

بغنيلك بصوت حزنان من الركنه

وبحكيلك بكسرة روح عن الغيبه

وبكتبلك كلام يوجع قوى جدا

ولا تحطينى فى لحظه فى كفه صدق

انا آسف

عشان محناش ملايكه بجد

مجرد شخبطات ع الحيط بتقنعنا

ونعمل ثوره ع الفاضى

وتبهرنا نتايجها

وفى الاخر ... منلقاش حد