مرسلة بواسطة كرانيش

-1-

يبيح المقهى فى ناصية الشارع
ان نقتات الموت بطيئاَ
أن نلعب بالنرد
ونقذف فى مللٍ أيدينا
ويبيح مراقبة الماره
والضحك على أطراف أصابعهم
وهى تزّلزل فى هلعٍ من شيخ فتوات الحاره
حين يبعثر بالآ فاق دخان التبغ
وسباب الموبوئين بحارته


-2-

ادهش حقاً
البنت تصارع فى غدها
تحجب عن أستار الحب الموت
رغماً عنها
لا تعرف من حب العشاق سوى شعراً
كانت تقرأه بالفصحى
وابن الجيران
يبحلق فى عينيها من خلف الشيش



-3-

فنجان قهوتك العبوس
يبرهن أن الموت كثيراً ما يزعجنا



-4-

قد جئت ياذا المعطفين
تبارك الفقر المدلى من أساطير الطريق
لا الحب ينفعنا اذن
ولا الشرخ المعلق فى جدار البيت
يسمح أن نحيد



-5-

مرآتك
فى كل صباحٍ تلعننى
أنى استأثرت بذاك النور على وجهك
لكنى أيضاً ألعنها
تستأثر كامل اشراقك فى كل صباح

مشاهد  

مرسلة بواسطة كرانيش

ورا الكواليس
اتنين شجر
واتنين لمون
واتنين حبّيبه بيتقاسموا أحلام بكره لبعده
وبيقترحوا أسامى عيال مرسومه فى نص الحلم
وبيتخانقوا..على مين هيودى الواد المدرسه فى الصبح
ومين هيحاول يمسك مصروف البيت
........بعديها
بتبان الضحكه على وشوشهم
لحد عنيهم ما تدمع
وبيخلص مشهدهم عالضحكه ام دموع

......

عالمسرح
بتبان انت ماسك جرنانك تحت دراعك كالعاده
مع انك مبتقراش منه
غير العنوان المتصدر فى الصفحه الأولى
كالعاده-هتلاقى وظايف بالكوم
بتشاور عالأتوبيس المزحوم
كالعاده
وبتحشر نفسك بين البني ادمين المخنوقه بموت امبارح
فالعادى ان يموت بكره
تبدأ ملامحهم تتكسر
فتلاحظ انها تشبه كل وشوش الناس من حواليك
الا انت
عاوز تلحق مواعيدك بالثانيه
هتروح عالكورنيش كالعاده
فتلاقى البنت اللى بتديك مواعيد مش مظبوطه
مهيش موجوده كالعاده
تبدأ تضحك نفس الضحكه ام دموع
تستغرب بعديها
ليه مبيكملش الحلم لحد الآخر؟؟!
مع انك بتكرر كل التفاصيل
وبتيجى الكورنيش
وبتفضل تستناها_كالعاده

.......

الناس بتسقف
فكراك بتمثل
ودموعك من ضمن المشهد

قول كلمتك  

مرسلة بواسطة كرانيش

قول ياللى لسه القول مايعرف سكتك
اصرخ بعزم ما فيك وبقوّتك
اوعاك تموّت بالخرس نفسك
اوعاك تقول مش دنيتك
غنى ولا يهمك
اصرخ ولا يهمك
عافر وقاوح
مل البكا من لون عنيك ..مل البكا منك
نفض ترابك من عليك
اخرج وشوف النهار واضح وصابح
كيف ما كان جدك
معرفش ليه منتاش عنيد زيه...؟
معرفش ليه غاوى موات
غاوى سكات
قول كلمتك
فكرنى بحروف العرب
يااااااااااااااااااااااااه
اصلى نسيت لون الكلام
من كتر ما انت الصمت راكبك
وفى الحقيقه
مش مستعده انى اندفن وياك هنا
وحقيقه أكتر
قلبى اتملى منك غضب

......  

مرسلة بواسطة كرانيش

زىّ ما كل الناس تستنى صباح الخير من كل الناس التانيين
زى ما الراجل ده اللى فى اخر بيت فى الشارع
مستنى جواب مالبوسطه بقاله سنين
زىّ ما كل بنات الشارع منتظرين الفارس الاسمر بحصانه الابيض يخطفهم
انا كنت -كمان-مستنياك
كون ان الساعه فى بيتكم مش مظبوطه

.....
فده مش ذنبى

 

مرسلة بواسطة كرانيش

بتحاول
بتحاول تبقى البنت الصابحه اللى اتمناها كتير فى منامه
بتحاول تبقى بضفيرتين
بتحاول تلبس فستانها الأحمر
رغم انه صغيّر
واللون مش موضه
انما بتحاول
بتجيب الحبل وعاوزه تنطه
وبتلعب حجله ويّا عيال الشارع
وماليه دولابها لبان وملبس
وبترسم ساعه على اديها
وتبص عليها
فتلاقى الوقت اتأخر جداً
واتأخر هو زىّ عوايده
.......
بيحاول
بيحاول ميكونش القاسى المتمرد
فيبص فى عينها يتردد
مش هى البنت اللى عنيها بتظهرله فى حلمه
ولا هى البنت ام فيونكات
رغم الفستان الاحمر
والتوكه اللى بتتدارى على الجنبين
وحكاوى كان يا ما كان
والأبله فضيله
والقلم المبرى
وبصتها من فوق الكبرى على كل الصور الغرقانه
وده كله
انما مش قادره تكونله
مش قادره توقف فى ساعتها ....والعقرب متضايق جدًا
علشانها و...يمكن علشانه
......
بيحاولوا
بيحاولوا ميبكوش قدامهم ولا هيجيبوا الساعه فى ايدهم
الساعه اصلها بايظه من مده
بتأخر جداً كل المواعيد الثابته
.......
هى: مبقتش بتسأل عالساعه ...وفكت ضفايرها
وفضت أحلامها من كل الألوان الحمرا
معادتش بتسمع أبله فضيله
والكوبرى.. مبقتش تروحله
وبتقنع روحها انها كبرت
ومعادش يصح انها تحلم به
......
هو: لساه بيدوّر عالصوره اللى اتحفرت على حيط قلبه
لساه بيطابق فى الصوره ...على كل بنات الشارع والجامعه ووظيفه بعد الضهر
وكل الصور المعروضه بره الاستوديو
...
وده كله
...
انما مش قادر يلقاها

 

مرسلة بواسطة كرانيش



لسه الاغانى ممكنه ممكنه

هكذا سمعته يغنى

....

وهكذا حاولت ان اتخيل

... وسألت نفسى هل فعلا لسه الاغانى ممكنه؟ تركت الكاسيت ودخلت الى غرفتى نظرت من الشرفه كثيرون هم من يسيرون فى الشارع من منهم لا زال يحلم؟ ومن منهم يعدو لكى يصل؟ ومن منهم فقد الامل؟ ومن ومن ومن .......مللت النظر الى البشردخلت ثانيه الى الغرفه اشيائى ملقاه على الارض..,صورى القديمه متناثره.. اشيائى الباليه لا تجد مكانا لتجلس به... حتى انا لا اجد مكانا بينهم ألقيت برأسى على الوساده وقبل أن أفعل شربت ذاك السائل المعبأ بهذه الزجاجه الصغيره ثم نمت... الى الابد

عنهم  

مرسلة بواسطة كرانيش

تجده يسكن كل ملامحك... يربت عليك دون أن يلمسك.... تجد الحفاوه فى عينيه اذ يراك
نصيحه:لا تتركه يرحل

سلامه


.......



تجتمع ملامحه فى آن واحد كى تقسم على أن تضحكك وتخرجك من هم يجثم على صدرك



سيزيف



........



يخرج فردا يطمئن عليك ويدخله ثانيه دون أن تشعر أنت بذلك

وربما هو أيضاً

ارسطو

.....


كائن اقسم على ان يهب نفسه للعزله....ربما بارادته أو باراده غيره فالأمر سواء


كائن العزله الكئيب


....

طيف رقيق.... يهرب عادة منه.. كى يأتى ليستنشق بعضاَ من أحساس خفى يسرى بيننا بالحب نحوه

شبابيك

.....

يبدو أنه قد اعتاد الغربه....فهل من عوده الى كرسى العرش؟؟

هوميروس

......

وصف نفسه بالغلب فهل حقا استحق اللقب؟؟.. لكنه رغم ذلك كان دوماَ ... عنتر

عنتر بن غلبان

....

اغلق جدار الباب ولم يسمح لأحد بالدخول....ثم لام الجميع

فرفوش

...

يأتى الينا أحيانا كى يعلن لنا أنه مازال حىُ يرزق

فهل حقا صدقنا؟؟؟

شهر يناير

عنهن  

مرسلة بواسطة كرانيش

تشعر معها انك بداخلها...تحملك كل الوقت معها تتحرك بك وتحنو عليك...وتربت على كتفيك بكفيها تلك اللتى حملت بين اصابعها كل معانى الشفقه والحنان
عين ضيقه
....

تحمل كل البراءه فى عينيها...براءه عمر مازال أحمق ...طفله تلهو بأشياءها...تبعثرك على حين غره حينما تحكى عنه حكاياتها القديمه...ذاك الساكن الجديد الذى دق بابها مؤخرا
ماريا ماجدولين

....

لا لم تكن سوداء يوما...هى دائما بيضاء ...مازال بياضها ينضح مما فيه الاناء
تبكى لأجلك وتضحك -ايضا-لأجلك
الورده السوداء

....
تنظر اليك بعين واعيه...تنغمس فيك...لتخرج أدق تفاصيلك..دون أن تعى أنت ذلك
شغف

.....

حزن خفى يسرى بين أهدابها...لم تقاومه يوما...فقط مدت ذراعيها لتأخذه ثم تبكى
غاده الكاميليا

....

سر يختفى بين ضلوعها...أبت الا تخرجه...تحاول عينيها اخفاءه قدر ما استطاعت ربما نجحت فى ذلك وربما لم تفلح
برد الندى

.....
تطمأن عليك اذ تنظر فى عينيك..تشعر بك..ترفعك لعالم ربما ينتمى للملائكه البيض
والمراكب السماويه البيضاء
بياترتس

....

أن تحدثها ولم ترها...هذا وارد
أما أن تتعلق بها وبصوتها الذى يحمل بين طياته القوه حينا والالحزن أحيانا أخرى ولم ترها
عذرا فهذا كثير
تسنيم

 

مرسلة بواسطة كرانيش


وللاسف.....كنت أنثى

ضمائر  

مرسلة بواسطة كرانيش

تؤرقنى تصرفات كل البشر
هو1: بكل سهوله باعنى بثمن بخس وبدأت انا فى تقبل الامر
......
هو2: كان عليه ان يكون أكثر تشبثاً بى
ربما أعتقد خطئا فى ذلك
وربما أجدنى قريبه منه هذه الأيام وأسعى أنا لذلك
لكنه لم يقدر
......
هى1: تعاتبنى رغم انها هى من تستحق اللوم
بكيت أثناء عتابها لي
بكيت لأننى وضعت رسما هلامياً لعلاقه لن تنتهى الا بالموت
ولم يحدث هذا وسعيت كثيرا لئلا يحدث
لكن......يكفى هذا
.....
هى2: تخبرنى أنى لابد أن أكون بجوار هى1وان لم أفعل
فسوف تضطر اسفه أن تنفصل عنا جميعاً
....
هو3: يقول بأنا أفسدنا بداخله شيئاً
يحتاج لاصلاح ما.....فلنتركه
.......
هم1: شىء ما يختلف
......
هم2: أشعر بأنى أحبهم كثيراً
....
أنا1: شىء ما مكسور بداخلى....ربما غير قادر على اصلاح نفسه
أو طلب الاستغاثه من اخر
رسمه الحزن معده مسبقاً على وجهى
عندما أبتسم أذكر أن هناك ما يدعونى للبكاء.....فقط للبكاء
فأكف عن الضحك
.....
أنا2: مللتنى جداً
....
أنا3: أريد الوصول الى خطوة البدء
فلتتركونى بعدها أنحو نحوى
وحدى من فضلكم
......
هى3: راحه أجدها عندما أقبل يديها وجبينها
.....
هى4: كرهت نفسى لأجلكِ
أعلم أنى لا شىء
لكنَى صدقاً
اســــــــــــــــفه
.....
نحن1: يدخلنا الشيطان لينزغ بيننا
فهل لم ندعه يفعل؟؟؟؟
....
أنتم: عوزاكم زىَ زمـــــــــــــــــــــــااااان

زغروته  

مرسلة بواسطة كرانيش

ولا عمرى حكيت للنجمه اسرارى

ولا عمرى صاحبت الشجره والقمره

ولا عمرى عافرت عشان اكون منك

....

اعتراف:كان نفسى اخدنى من نفسى

الاقينى

حوريه والضفاير ليل

اقول مواويل

ومستناكش تندهلى

واجيب قمرايه تشبهلك

تزوقنى

واعافر لجل اكون منك

...

حقيقه:وبرغم كل المستحيل

منتاش عشانى

بتزوقك كل المعانى

وهىّ

واقفه بتحرسك

وانا من بعيييييييييد

واقفه بشاور للنجوم

وبعاتب الليل والقمر

وبزغرت الزغروته يوصل ضيها لكل البشر

الا انا

انا لا أكذب ولكنى اتجمل  

مرسلة بواسطة كرانيش

متسألونيش بحب مين من المغنيين؟ عشان العادى انى اقول منيرواعمل فيها بروح ساقيه الصاوى كل يوم و متسالونيش بحب مين من المغنيات ؟عشان بديهى جدا انى اقول فيروزوابين بقى انى بصحى على صوت العصافير وصوتها
ومتسالونيش ايه الافلام اللى بتحبيها
:عشان هقول
افلام يوسف شاهين طبعا منا لازم ابين انى مثقفه
رغم انى بقعد قدامها كانى بتفرج على فيلم تايوانى مش مترجم
ومتسالونيش بحب لون ايه؟عشان طبيعى هعمل فيها رقيقه واقول السماوى عشان بيفكرنى بلون السما وهقول بعدها
"اصل السما من الحاجات اللى بتشدنى بحس انها عالم تانى فيه مخلوقات تانيه0
ومتسالونيش انا برج ايه ؟عشان هضطر اقول العزراء
وانا برج العقرب اصلا
ومتسالونيش الهديه اللى تحبى تتهادى بيها ايه؟
عشان هرد واقول
الهديه مش فى قيمتها يعنى مثلا ورده
وهقول فى نفسى وياريت معاها تلاتين جنيه عشان اقدر اكمل الشهر
ومحدش يسالنى تحبى تكونى فين دايما؟
عشان هرد بمنتهى الرومانسيه واقول جنب البحر طبعا ودى عاوزه كلام؟!!
ومتسالونيش عن علاقتى بالناس اللى حواليّه عشان هرد واقول
الناس كلها بقت وحشه
وانا بحاول اتاقلم معاهم
ومتسالونيش ليه بتحبى الشعر؟
عشان هعمل فيها نزار قبانى واقول الشعر بيخلقلى حياه تانيه
ومحدش يسالنى عن اى حاجه
عشان كل حاجه بقت كدب
الناس كلها بقت بتكدب
حتى انا بقيت بكدب على ماما كتييير
وبقيت ببدا اتعلم حرفه الكدب
يارب عافينا واعف عنا
امييييييييييييييين

منتاش ولى  

مرسلة بواسطة كرانيش

منتاش ولى
ولا ليك قريب م الاوليا
ولا كان لجدك فرع ماسس انبيا
فمترتديش توب الولى
وتيجى ترقينى باديك
وان ماارتقيت
انا عارفه راح تسخطنى ايه؟
...
يامعلمه الصبر لبنات الحور
تعالى علمينى
اصبر وانا شيفاه غريب
مش ذى ما اتعودت اشوف الأوليا
سابل عليهم نور هدايه ربنا
ولا زى مااتعودت ا شوفك بتهادينى الضحكه يوم لما اتحنيت
جتنى وبكيت
مبقتش عارف تعمل ايه
....
انت الغريب يابن البلد دى
انت اللى هتعلمنى أبكى؟؟
وبدال ما تمسح دمعتى
زودتها
روح بقه
اياك يسامحك ربنا
بس ابقى فاكر كلمتى
منتاااش و..ل...ى

استغلالاااات  

مرسلة بواسطة كرانيش

لقتنى باستغل حاجات كتير عشان اوصل لحاجات أكتر
..

باستغل تخريط البصل عشان أبكى بحرقه من غير ماحد يقوللى مدمعه ليه؟
بستغل روايه ناديه ليوسف السباعى عشان أطلع فيها كبتى واعيط
بستغل الليل عشان اقعد لوحدى
بستغل غسيل المواعين عشان افكر فيه مع نفسى
بستغل اغنيه *بس اما تيجى وانا احكيلك عاللى جرى*عشان اغنى بصوت عالىو اصرخ فى وسط الاغنيه
واقول*لا حد قال عنك خبر يفرحنا
ولا حد جاب منك كلمه تريحنا*
بستغل شيماء صاحبتى عشان احكيلها عن همومى ومشاكلى وارتاح
بستغل اصحابى فى الجامعه عشان احس انى راقيه واتاكد انى لسه بعرف افكروافرح واضحك
بستغل كتاب*تاريخ الاسلام فى مصر*عشان احطه قدامى واسرح
بستغل اجنده مذكراتى عشان اصب فيها كل همومى وخواطرى
بستغل النوم عشان أحلم
بستغل صحابى اللى بيستشيرونى فى حاجه تخصهم عشان اتفلسف وابين لنفسى انى مهمه


....

انا كده ابقى وحشه؟؟؟؟؟

تاج ياناس  

مرسلة بواسطة كرانيش

اول مره اعمل تاج بس ده كان بناء على رغبه تسنيم حبيبتى
عايزه تعرف خمس حاجات محدش يعرفها عني
ماشى يا ست توسى
اول حاجه
انى بعيد عن السامعين جبت 77فى الميه فى الثانويه العامه وكانت اول قلم صح اخده على وشى
محدش يعرف الكلام ده عنى وده سرى للغايه
...

تانى حاجه
انى بخاف مووووووووت من الفراخ وبترعش لو مسكت فرخه وممكن يغمى عليه
لا وبقرف من القطط والكلاب مووت موووووت
...

تالت حاجه
انى ناويه اعنس
..
بمزاااااااااااااجى

...

رابع حاجه
اللى محدش يعرفه عنى خاااااااالص انى نفسى ادخل السجن
لو حتى يوم واحد
ومش عارفه اعمل ايه؟؟؟؟

...

خامس حاجه

انى اتحجبت وانا فى خامسه ابتدائى
وماما كانت بتحاول تخلينى اخلعه بس انا رفضت
....

اى خدمه يا ست توسى
وهمرر التاج لخمسه
سلااااامه
شغف
غاده الكاميليا
عيون ضيقه
سيزيف

........الضحك من غير سبب  

مرسلة بواسطة كرانيش

تجرى الايام والسنوات سريعا
سريعا جدا...بلاتوقف
لاتمهلنا
لاتدعنا مليا
يالها من قاسيه هذه الايام
اذكر السنوات الماضيه قريبا جدا
كأنها بالامس
الأمس القريب
أشعر أنى كبرت سريعا
أرانى الان وأنا فى طريقىالى المدرسه معى أخى الاصغر
ارانى تلك البنت التى تدعى التفوق فى كل الحصص وتفعله فى حصه اللغه العربيه التى كنا نطلق عليه قراءه
كم كنت أحبها تلك البنت
كم كانت تملأ الدنيا فرحا وبهجه...
كم كانت تضحك كثيرا..كثيرا جدا
ويغتاظ منها المدرس ويتحول هذا الغيظ الى ضحكه..يعقبها دعاء بالشفاء
ظنا منه انى مريضه بالضحك
...
فى الثانوى
بعثت مدرسه الجيولوجيا استدعاء لولى الامر
كى تحثه على علاجى من هذا المرض اللعين
وذهبت الى المنزل
واخبرتهم بذلك وأنا فى هستريا من الضحك
وضحك والدى وامى واخوتى

...

فى الجامعه
بدات اشعر بتحسن..بدأت أعراض المرض تزول
كما افترقت عن صاحبتى تلك التى كنت انظر فى وجهها فتتملكنى نوبه الضحك
لم أعد أراها....فسكنتنى الوحده
صرت املك نفسى وأروضها على الحزن..كان هذا هو الحل الوحيد للشفاء من المرض
...
فى نادى أدبى قصر الثقافه
اصطحبت صديقتى معى...وحدث هناك ما أضحكنا
اكتفيت بالبسمه وضحكت صديقتى كثيرا

هذه المره كانت وحدها
سألتنى بدهشه"مالك يا كرانيش؟مبتضحكيش ذى عادتنا"أجبتها بأنى شفيت
...
هل حقا الضحك مرض؟
ام كنت أنا التى تستدر الأشياء كى تضحك؟
كانوا يخبروننى"بان الضحك من غير سبب قله أدب" لم اقتنع أبدا
كان عليهم اذا ارادوا ان اكف..أن يضعوا البلستر فوق فمى أو فوق قلبى ذاك الذى كان يضحك كثيرا
...كان عليهم أن يقولوا لابد ان تحبى كى أكف عن الضحك
كان عليهم أن ينصحوننى بسماع منير
...
الان -فقط-كففت عن الضحك يا ميس مايسه
الان-فقط-كففت يا أستاذ عصام
الان فقط كففت عن الضحك يا أستاذ فكرى
الان فقط يا شيماء أحتاجك
كى أضحك
أحتاجكم جميعا"