تغريبات  

مرسلة بواسطة كرانيش

-1-
مبقتش بتعرف تبنى البيت الرملى
مبقتش بتعرف تلعب طاوله معايا
ولا تيجى تاخدنى من الشغل الضهر
ونخرج ناكل كشرى
وبعد ما نخرج
نجرى نسابق عربيات الرش فى عز الصيف
كنت حنين قوى على قلبى
كنت تخاف على صورتى الساكنه فى جيب البدله
ليوم تتكرمش
فبقيت بتسيبها فى بيتنا
وبقيت تنسى تقولى (بحبك
.......
-2-
"يشغلني عياط البنت وهي بتصرخ :"بابا
يتوغوش قلبى
افكر اسمع صوتك فى التليفون
اتفاجىء لحظه بانى نسيت النمره
.......
-3-
مليت من فيلم دعاء الكروان
فاكره لما سمعناه اول مره
وبكيتلك يومها وضميتنى
غنيتلى
"لو كنت يوم انساك"
نفسى اشوف الفيلم معاك تانى
.....
-4-
الواد بيحب-
بيحب؟ اهو ده اللى كان ناقص-
ياااااااااااه
فاكر اول مره تقولى بحبك؟
اول مره بنسمع شاديه
اول مره تجيلى الجامعه
.....
-5-
وحشتنى خروجه الكشرى-
مشغول-
طب تيجى نروح البحر؟-
!! ده احنا ف عز البرد-
كنا بنبى البيت الرملى جنب البحر فى عز البرد
كنا بنجرى ونروى كعوبنا بلون الميه فى عز البرد
....
-6-
لسايا بكتب شعر
ولسه بنقش الاحلام على بابى
ولسه حروفك الاولى اللى سكنانى بتعشقنى
ولساك بتحب منير زي مانت
بس مخدتش بالى ابدا ابدا
انك انت كمان
لسه بتسمع شاديه
لأ و كمان لسه بتقرا جاهين
!!!!

زمااااااااااااااااااااااااااان  

مرسلة بواسطة كرانيش

كنا واحنا صغيرين ابريا
انا فاكره انى قلت لامى مره ليه نجاه بتقول روح يانوم من عين حبيبى رغم انها بتحبه؟؟ ردت عليه بان كله كلام فاضى
وفكرت بعدها كتير هل هو فعلا كان كلام فاضى؟ومن ساعتها مش لاقيه اجابه
.........


وفاكره انى كنت زمان بشب عالحوض عشان اطول حنفيه الميه بس دلوقتى بوطى عشان الميه تبقى قريبه منى..
....

وفاكره انى مره وانا ببص من البلكونه كنت هقع من الدور التانى وقعدت اعيط عشان كنت خايفه من الموت دلوقت انا بعيط عشان خوفى من الحياه.........هى فعلا الحياه بتخوف زى العفريت؟؟؟
....

ههههههه
فاكره وانا بفتح باب التلاجه واتخلع فى ايدى حسيت ساعتها انى هوجان بس بكيت ساعتها مش عارفه ليه؟
......

ماما بتقولى وانا صغيره مكنتش بحب العب مع العيال وكنت بكتفى بالفرجه
انا مصدقاها......لانى ببساطه لسه لحد دلوقتى بتفرج

....








يلملمني السكات  

مرسلة بواسطة كرانيش

يلملمنى السكات

فاهرب على صوتك ..يلاقينى دفا سكوتك
متحرمنيش من الكلمه اللى كات دايبه فى سمار امسى

ولا همسك ولا همسى هينفع فى القسا بكره

....فيتكلم

يبعترنى على جسره

يفرحنى......فيتندم

متحبسش الكلام جواك

شجاعتك تغلب الكتره

واشوف فى عنيه ملامح للذهول واسعه

واشوف دمعه

واشوف بسمه بتتخفى ورا امبارح

فأتلم......

يلملمنى....يداوينى

ويرسمنى كما الاطفال

ببسمايه وكام ضحكه وعلب الوان

يغنيلى:خايف أقول اللى فى قلبى

ويضحكلى

فاغنيله:يابو ضحكه جنان